Без ерак еллар аша, Тукайның яшендәй яшьнәп кенә узган кыска гомер юлын, ул калдырган иҗади мирасны, аның яшәү үрнәген күз алдыннан уздырып, соклану һәм горурлану хисләре кичерәбез.  Бүген 3 нче һәм 4 нче сыйныф укучылары арасында Тукай иҗаты буенча викторина уздырылды. Балалар белемнәрен раслый алдылар. Горурлык хисләре белән "Туган тел"не җырлап, командалар очрашуын күңелле рухта тәмамладылар.

          "Язгы мәрхәмәтлелек атнасы" дәвам итә. Шул атна кысаларында мәктәптә төрле чаралар үтә. 21 нче апрель көнне "Мөстәкыйль балалар" төркеме "Карлыгач" балалар бакчасында төрле хәрәкәтле уеннар уйнаттылар. Яхшылык эшләүне һәркөн дәвам итик.

 "Спортлы Татарстан" акциясе һәм Кино елы уңаеннан бүген 4 нче һәм 7 нче класс укучыларына спорт темасына багышланган кино күрсәтелде.

      Быел, 2016 елда, татар халкының бөек шагыйре, татар әдәбияты классигы, әдәби тәнкыйтьче, публицист, яңа заман татар әдәбиятына һәм әдәби теленә нигез салучы – Г.Тукайның тууына 130 ел тула. Шул уңайдан республикакүләм һәм Бөтенроссия күләмендәге төрле чаралар уздырыла. Бүген республикабыз мәктәпләрендә “Тукай дәресләре” үтте.

       Әлеге чараны үткәрү максаты булып мәктәп укучыларын Г.Тукайның тормыш юлы һәм киңкырлы иҗаты белән таныштыру, олуг шагыйрьнең татар халкы тормышында, татар әдәбияты тарихында тоткан урынын күрсәтү, шулар аша укучыларда татар халкының тарихына, мәдәниятына, әдәбиятына мәхәббәт һәм хөрмәт хисләре тәрбияләү, югары әхлаклы, тирән белемле һәр яктан камил шәхес формалаштыру тора.

            Бүген мәктәбебездә "Мәрхәмәтле Татарстан" акциясе кысаларында "Донорлар көне" уздырылды. Нәгыймова Р.Р.  "Кемнәр ул-донорлар" дигән темага 9 нчы класслар өчен ачык класс сәгате үткәрде. Донорлыкның файдасы, төрләре, кагыйдәләре һәм кемнәр донор була алулары  белән таныштырды.

        Мәктәбебездә "Спортлы Татарстан" акциясе дәвам итә. "Спорт һәм уку" темасы астында 2 нче һәм 4 нче класс укучыларына физик тәрбия укытучысы Нәбиуллин Р.Р. спорт белән шөгыльләнү, спорт һәм укуның бер-берсенә тыгыз бәйләнештә булуын аңлатты. Укучылар белән төрле ярышлар үткәрделәр, саф һавада хәрәкәтле уеннар уйнадылар.

   Һәр җирдә Г.Тукайның 130 еллыгын каршыларга әзерлек бара. Г.Камал исемендәге Сикертән төп гомуми белем мәктәбендә 18 нче апрельдән Г.Тукайның 130 еллыгына багышланган 10 көнлек башланып китте. 19 нчы апрель көнне 6 нчы һәм 7 нче класс укучылары өчен Г.Тукайның тормышына һәм иҗатына багышлап Хәбирова Сиринә Илшат кызы класс сәгате үткәрде.  Укучылар Тукай йөргән сукмаклардан йөрделәр, викторина чиштеләр. Апрель аенда һәркемнең күңелендә Тукай рухы яши!

       16 апрельдән республикабызда "Мәрхәмәтле Татарстан" һәм "Спортлы Татарстан" акцияләре башланып китте. Мәктәп күләмендә үткәрелгән линейкада акциянең максаты һәм бурычлары аңлатылды.Бүген "Дуслык көне" темасы астында классларда тәрбия дәресләре үткәрелде. Шулай ук укучыларыбыз "Спортлы Татарстан" акциясенә кушылып ГТО нормаларын үтәделәр.

      Габдулла Тукайның әсәрләре үлемсез. Аның әкиятләре һаман да популяр. Тукай – мәңге сүнмәс йолдыз ул. Тукай айлыгында үткәрелгән һәр чара укучыларда зур кызыксыну уята, аны тагын да тирәнрәк өйрәнергә этәргеч бирә. Бүген 18 нче апрель көнне мәктәбебезнең башлангыч һәм 5–7 сыйныф укучылары Гөберчәк авылы китапханәсендә китапханәче Г.З.Зарипова белән очрашып, Тукай иҗатының күпкырлы икәнлегенә инандылар. Соңыннан укучылар Тукайның әсәрләрен сәхнәләштерделәр, шигырьләрен яттан укыдылар.

      Һәрбер урман үз агачы, һәр тау үз кыясы, һәр болын, ялан үз чәчкәсе белән күркәм булган кебек,  һәрбер милләт тә үзенең талантлы, атаклы ул – кызлары белән күркәм. Илне ил итеп, халыкны халык итеп күтәрүче дә алар.

      Татарстанның халык язучысы, Г. Тукай исемендәге Дәүләт премиясе лауреаты, күп санлы әсәрләр авторы- М.Мәһдиев әнә шулай халыкның йөрәге, халыкның күзе булып яшәгән шәхесләрнең берсе иде. Халкым дип янып яшәде... Ул зур дәрәҗәләргә дә иреште, ләкин гади булып кала белде. Шул килеш безнең күңелләрдә калды.

Булачак Халык язучысы үзенең иҗат эшчәнлеген яшь хәбәрче булудан башлаган. Ул 1948 – 1960 нчы елларда Саба, Арча төбәге мәктәпләрендә укытучы булып эшли. Яшь мөгаллимнең каләм чарлый башлаган вакыты шушы чорга туры килә. Вакытлы матбугат битләрендә үз мәкаләләре һәм шигырьләре белән чыгыш ясаган яшь укытучы ХХ йөз ахырына Габдулла Тукай премиясе лауреаты һәм Татарстан Республикасының халык язучысы дәрәҗәсенә ирешә.

Мөхәммәт ага бик күп еллар дәвамында Казан дәүләт университетында махсус курс алып бара, татарлар яшәгән төбәкләрдә фольклор әсәрләрен җыю экспедициясен оештыра.

 Мөхәммәт Мәһдиевне һич икеләнмичә без үзебезнеке дип әйтәбез, чөнки ул дәһшәтле Бөек Ватан сугышы елларында безнең мәктәптә укыган. 1944 нче елның 24 нче июнендә Сикертән җидееллык мәктәбен тәмамлау турында таныклык алган.

   Авылдаш язучыбыз Мөхәммәт Мәһдиевның  үлемсез әсәрләрен яратып укыйлар, халыкчан әдәби геройларын күңел түрендә саклыйлар. Шул уңайдан  16 нчы апрель көнне  мәктәптә Габдулла Тукай премиясе лауреаты, Халык язучысы Мөхәммәт Мәһдиевка мемориаль такта ачу тантанасы булды. Бәйрәмдә язучының кызы – Саҗидә Сөләйманова премиясе лауреаты Гәүһәр Хәсәнова, Арча мәгариф бүлеге җитәкчесе Дәүләтбаев Зөлфәт Миннефәрович, Арча мәгариф бүлегенең милли мәсьәләләр бүлеге методисты Мостафина Энҗе Габдуллатҗан кызы, Арча муниципаль районының башкарма комитеты җитәкчесе урынбасары Гарифуллин Рамил Илгиз улы,Татарстан Республикасының Габдулла Тукай фонды президенты  “Ватаным Татарстан”газетасының   парламент хәбәрчесе  Гыйлемханов Риман Солтан улы,  укучылар сарае каршында оештырылган   “Нур” телерадио студиясе  яшь  хәбәрчеләре катнашты. Тантанага килгән кунакларның истәлекләре  укучылар чыгышы белән үрелеп барды. Гәүһәр ханым әтисенә  кагылышлы истәлекләре белән уртаклашты. Олы шәхес турында бары җылы сүзләр әйтелде, хөрмәтләп, сагынып искә алдылар. Мөхәммәт Мәһдиев  исеме Сикертән авылы халкы өчен зур горурлык һәм ул тарих битләрендә лаеклы урын алды.