21 көн ни арада   үтеп китте!?  Шушы көннәрдә мәктәп яны  балаларның шат авазыннан яңгырап торды. Канатлы җырлар,дәртле биюләр, мавыктыргыч  уен-сәяхәтләр укучыларга бик ошады.

           Саубуллашыр көн дә килеп җиткән. Рәхмәт сезгә вожатый апалар: Рая Павловна, Рузия Гафуровна, Гөлгенә Данисовна, Гөлнур Мансуровна, Фәридә Һидиятулловна, Сиринә Ильшатовна! Рәхмәт тәмле ашларыгыз өчен, Гөлүсә апа! Якты йөз белән каршы алып, чисталыкны саклаучы Фәридә апа! "Дуслык" лагеренда чын дуслар таптык,  күп һөнәргә өйрәндек. Сау бул, лагерь!

Яраткан "Дуслык"лагере

Саубуллашабыз бүген. 

Моңаеп калма,мәктәбем!

Килербез сиңа көзен.

      СМС балалары белән бергә "Сәламәт буласың килсә - бие!" девизы астында флэш - моб үткәрелде. Көләч йөз, биегәндә матур елмаю, пластик хәрәкәтләр - чыннан да кешенең рухи һәм  физик яктан сәламәт икәнлеген күрсәтә.

     20 нче июнь - Хәтер көне. Җирлегебездәге бердәнбер ветеран Дәүләтшин Фатих Дәүләтша улы белән  очрашуга киттек. Ветеран бик җылы каршы алды. Башыннан үткән дәһшәтле сугыш еллары,үзенең фронтта булуы,орден - медальләр белән бүләкләнүе, яралануы турында сөйләде, балаларның сорауларына җавап бирде. Ветеран оста итеп гармунда уйнады. Очрашу бик эчтәлекле булды,күтәренке рухта үтте. Балалар ветеранга истәлекле бүләк тапшырдылар.Сугыш кырында ятып калган авылдашларыбыз бер минутлык тынлык белән искә алынды, һәйкәлгә чәчәкләр кулды.

Лагерь булсын да, “Сабантуй” бәйрәме булмасын, имеш. Юк инде! Бүген бездә Сабантуй! Бүләкләр җыелды. Сабантуй тугаена җыелып, милли уеннар уйнадык: кул көрәштердек, авыш колгага мендек, чүлмәк ваттык, кашыкка йомырка куеп йөгердек, таяк тартыштык, йөгерештә катнаштык, рәхәтләнеп күңел ачтык. Ә иң соңыннан һәр төр буенча җиңүчеләр билгеләнде, күңелгә хуш килердәй бүләкләр тапшырылды, һәркем канәгать калды.

Лагерьның иң-иң көннәре:

Сабантуй бүген беэдә!

Онытылмас бәйрәм булып,

Калыр ул күңелебездә!

Бүген безнең балыкка барасын белгәндәй кояш та болыт артына качкан. Нәкъ балык тота торган көн булды. Уздырышка балык тоттык һәм рекордларны яңарттык: иң зур кызылканатны Мәһдиев Әнис, ә иң кечкенә шыртлаканы (нибары 3 см) Солтанова Зәринә, иң күп - 7 балыкны Мәҗитова Галия тотты. Ә иң беренче  балыкны Әсхәдуллина Илүсә тартып чыгарды.

Чын балыкчы булмасак та,

                                                             Балыкны шәп каптырдык.

                                                             Оста балыкчыларга

                                                             “Афәрин!” диеп тордык. 

      Китапханәче Гөлфирә Зөфәр кызы лагерь вакытында да укучыларны яңа китаплар белән таныштырып бара, кызыклы һәм мавыктыргыч уен элементлары белән китапка кызыксыну уята.  

        Лагерьның һәр көне үзенчәлекле уеннар, истәлекле даталар, мавыктыргыч кичәләр белән үрелеп бара. Бүген - “Индеецлар көне”. Без үзебезне индеецлар кебек хис итеп, бер көн аларча “яшәп” алдык.

“Индеецлар көне” бүген,

Лагерь шаулый, гөр килә.

Индеецлар булдык менә,

Кем шаяра, кем көлә. 

      "Уңган егет, уңган кыз бәйгесе"! Ура!" Бу бәйгене инде күптән көтәбез. Һәрберебезнең иң-иң яхшы буласы килә. Ярышларның нинди  генә төрләрендә көч сынашмадык.  Җиңүче булып егетләр арасыннан Минзин Ранис, кызлар арасыннан Хәбирова Әлфинә һәм Мәҗитова Галия булдылар.

Тормыш булгач, бар да кирәк,

Яулыгын да ябасың.

Токмач җәеп, аш пешереп,

Яшәргә өйрәнәсең! 

      Иртәдән үк көн матур. Күктә кояш елмая. Безнең дә күңелләр әнә шул кояшлы , ямьле көн кебек. Бүген авылдаш язучыбыз Мөмәммәт ага Мәһдиев музеена һәм Гөберчәк авылы китапханәсенә экскурсиягә мендек. Музей җитәкчесе Габидуллина Халидә апа эчтәлекле әңгәмәсе белән җәлеп итте, яңа экспонатлар белән таныштырды. Китапханәдә дә булдык. Яңа китаплар белән таныштык, китаплар укыдык. Соңыннан М.Мәһдиев каберенә бардык, аны хөрмәт белән искә алдык. Язучының безнең арадан китүенә бүген 21 ел. 

Җырың, моңың калды Гөберчәктә

Онытмабыз сине киләчәктә,

Рухың яшәр безнең мәктәптә.

      Озын гомерле булырсыз, 

Шат елмаеп йөрсәгез,

Җәй көне дә Яңа ел

Үткәрдек без белсәгез.

Искечә бүген май бетте,

Иртәгә июнь инде.

Кыш бабабыз җәй аенда

Безгә кунакка килде.