Лагерь балалары Бөек Ватан сугышы ветераны Дәүләтшин  Фатых  абый янына кунакка бардылар." Гел кояш елмайсын, илебез күге тыныч булсын, тыныч тормышның кадерен белегез !"  Ветеранның бу сүзләре балалар күңеленә тирән уелып кереп калды.

   Иң күңелле көн бүген,

Сабантуйга килегез!

Капчык киеп йөгерегез,

Чабыгыз,сикерегез!

  Лагерьга Гөберчәк авылы китапханәчесе Зарипова Гөлфирә Зөфәр кызы килде.Балаларны яңа китаплар белән таныштырды. "Серле китап" уены балаларга гына түгел, вожатый апаларга да бик ошады. Иң актив укучы  өр-яңа ,Гөлфирә апача әйтсәк  "табадан гына төшкән" китап белән бүләкләнде.

     Бүген лагерьның иң җанлы көне булды. Кармакларыбызны алып су буена балык тотарга бардык. Иң күп балык тотучылар Илназ, Илүсә, Рәзиләләр булды. Бүтәннәр дә алардан калышмаска тырышты. Соңыннан үзләренең балык тотуларын рәсем итеп кәгазь  битенә төшерделәр. Көн бик күңелле үтте.

  Әкиятне кайсыбыз гына яратмый?! Бүген без "Әкиятләр  илендә".  Тылсымлы таяк үз кулыбызда: телим Таңбатыр булам, яисә Кызыл Калфак. Кем булсак та,  яхшылык кына эшлибез.  Ә безне таныйсызмы?

   Һәркем җиңүгә омтыла.”Күңелле стартлар” барышында “Гөлкәйләр” дә, “Елмай” да сынатмадылар, бергәләшеп ярыштылар. Саф һавада рәхәтләнеп күңел ачтылар, көч сынаштылар. Матур көннең нәтиҗәсе дә матур булды – ДУСЛЫК җиңде! Соңыннан күмәкләп татарча бию кәефләрне тагын да күтәрде.

Бергәләшеп шәп ярыштык,

Беркем читтә калмады.

Нәтиҗәләр күркәм булды:

Дуслык җиңү яулады!

   Бүген лагерьның иң мәзәк, иң җанлы көне. Балалар да, вожатый абый – апалары да  индеецлар булып киенделәр, буяндылар, үзләренә индеец кабиләләре исемнәре сайладылар. Конкурсларда катнашып,  “Иң төз атучы”, “Иң оста ауга йөрүче”, "Күз бәйләнгән килеш тә дөрес итеп үз аяк киемен табучы” һәм башка шундый биеклекләрдә үзләрен күрсәттеләр. Ә шулай да иң күңеллесе: индеецлар кебек бию булгандыр. Ахырдан истәлеккә дип бергәләшеп фотога төштек.

        Нинди генә талантлар юк бездә?! Кем көнгерә кебек сикерергә, кем җырларга, кем кошлар авазы чыгарып сайрарга дисеңме! Ә менә без парлашып биеп үзебезнең сәләтле икәнебезне күрсәттек.

Без – талантлы, җитезләр без,

Без һәр эшкә сәләтле!

Күрсәтеп өлгереп булмый,

Бездә булган сәләтне! 

  Бар минем дускаем

 Иң якын сердәшем.

 Һәр җирдә, һәр эштә

 Киңәшчем, иптәшем.

 Өйрәтә ул миңа

 Бар фәнне, телләрне.

Юк аның белмәгән

Сәнгате, һөнәре.

Күргәнен, белгәнен

Барын да аңлата.

Көлдерә, җырлата,

Уйлата, юата.

Син аны беләмсең?

Кем соң ул, уйлап тап!

Иң якын дускаем,

Киңәшчем – ул китап.

     Без бай тарихлы бөек илдә яшибез. Россия көнен  дәүләтебезнең һәр җирендә билгеләп үтәләр. Шулай итеп, үз  традицияләре, тарихы, халкы, җиңүләре булган бөек  илебезне данлыйбыз.