Февраль ае безнең укучыларыбыз күңелендә "Аҗаган" - хәрби-патриотик уены белән истә кала торгандыр. Бу уенны укучыларыбыз зур түземсезлек белән көтеп ала. Алар, командаларга бүленеп, төрле спорт ярышларында көч сынашалар. Менә бүген дә кечкенә сыйныф укучылары арасында чаңгы ярышы үтте. Укучылар бу уенга бик теләп әзерләнәләр һәм катнашалар. Һәрбер бала җиңүгә үзеннән өлеш кертергә тели. Уңышлар сезгә, кадерле укучылар!

Татарстан Республикасы Дәүләт гербы – Татарстан дәүләти символы. 1992 елның 7 февралендә Татарстан Дәүләт Шурасы тарафыннан расланды.
Татарстан Республикасы Дәүләт гербының авторлары – филология фәннәре докторы Назым Ханзафаров (идеясе) һәм рәссам-монументалист, Татарстан Рәссамнәр берлеге әгъзасы Риф Фәхретдинов (башкаручы).
Татарстан Республикасының Дәүләт гербы кояш җирлегендә алгы уң аягын бераз күтәргән, янтавында түгәрәк калкан булган канатлы барс сүрәтеннән гыйбарәт. Кояш түгәрәге татар милли бизәге төшерелгән, аскы өлешенә "Татарстан" дип язылган кайма белән уратып алынган.
Канатлар җиде каурыйдан, калкандагы розетка сигез таҗ яфракчысыннан тора.
Татарстан Республикасының гербы Татарстан флагының төсләре белән ясалган, һәм ул түгәрәк формалы.
Гербның үзәк образы – канатлы барс – элекеге заманда уңыш, балаларны саклаучы тәңре булган. Татарстан Республикасы гербындагы Ак барс – республиканың һәм анда яшәүче халыкның саклаучысы.
Ак барс кызыл кояш җирлегендә урнашкан. Кояш – элекеге заманда күп халыкларның баш тәңреләре булган. Татарстан гербындагы кызыл кояш хәерле күренеш, уңыш, бәхет, яшәешне аңлата.
Ак барсның сул ягындагы түгәрәк калкан Татарстан Республикасы гражданнарының икътисади, хокуки яктан саклану астында булганнарының билгесе.
Татарстан Республикасының дәүләт гербы төсле итеп бизәлгән: кояш – кызыл, Ак барс, аның канатлары, калкандагы розетка – ак, янтавындагы түгәрәк – яшел, калкан, бизәк һәм "Татарстан" язуы – алтын төс белән ясалган.
Кашкарый җөп санлы таҗлары белән мәңгелек яшәү чишмәсен, гомернең озынлыгын һәм озын гомер теләвен аңлата.
Барсның күтәрелгән алгы уң аягы – югары хакимиятнең бөеклегенә ассызымлаган традицион геральдик ишарә. Ул шулай ук эшнең уң аяктан башланганын , Татарстанның яңарыш юлындагы баруының хәерлесен аңлата.
Барсның очлы тешләре һәм тырнаклары аның үз-үзен һәм химая иткәннәрен дә яклый алуын белдерә.
Барсның җиде каурые тирә-якка тәэсир итү көче җирдә дә, күктәдә булуын аңлата.
Барсның коерыгының торышы яхшы кәефне, дуслыкны белдерә.
Татарларда популяр булган яшелчә орнаменты һәм ләлә чәчәге Татарстанның тууын, язгы табигатьнең уянуыны символлаштыра.
Өч алтын түгәрәк гербны өч дәрәҗәдә чолгый. Алар бердәмлек, чиксезлек һәм иң югары камиллек идеясен чагылдыра. Төсләрнең символик билгеләре:
алтын төс – нәфислек, матурлык, Татарстан җирләренең байлыгы;
яшел төс – язның яшеллеге, Татарстанның яңадан тууы;
ак төс – Татарстан кешеләренең чиста уйлары;
кызыл төс – Татарстанның өлгергәнлеге, энергиясе, көче, яшәеше, яши алганлыгы;
Татарстан Республикасының гербы әхләк байлыгы, гаделлек, халык арасындагы тынычлык, прогресс шикелле гомум кешелек сыйфатларны раслый.
Шул уңайдан бүген мәктәбебездә "Татарстан Дәүләт символлары" исеме астында класс сәгатьләре үткәрелде.

Бөек Ватан сугышы елларында татар шагыйрьләре, Советлар Союзының барлык әдипләре белән бергә, немец басып алучыларына каршы көрәште, кулларына корал тотып та, каләмнәре белән дә актив катнашты, явыз дошманны Ватаныбыздан куып чыгаруда батырлыклар курсәтте. Киләчәктә әсәрләр, героик саллы образлар тудыру өчен, рухи азык, рухи чыныгу тәрбиясенең югары мәктәбен үтте.
Һәp солдат кебек, шагыйрьләр дә Көнбатыш Европа илләрен гизгән көрәшчеләр булдылар. Халыкны явыз дошманга каршы изге көрәшкә чакыру, фашистларның ерткычлыкларын бөтен дөньяга фаш итү, илебез солдаты, тыл батырлары күңелендә җиңүгә ышаныч тудыру, дошманга каршы ачы нәфрәт хисләре уяту эшләре әдипләргә йөкләнгән иде. Алар радиода эшләделәр, патриотик җырлар, шигырьләр, хикәяләр, повестьлар, пьесалар, сценарийлар яздылар. Үз әсәрләре белән күпмеңле армия аудиториясендә, колхозларда, клубларда, госпитальләрдә чыгышлар ясадылар... Фронтта hәм тылда… Көрәшнең алгы сафында hәркөнне алып барылган бу эш безнең күп әдипләребезнең иҗатын күрелмәгән югарылыкка күтәрде.
Бүген татар теле һәм әдәбияты укытучысы, Әюпова Рания Фирдүс кызы, 9 нчы сыйныф укучылары белән татар әдәбияты дәресеннән ачык дәрес күрсәтте. Дәрес темасы: "Сугыштан соңгы һәм 1960-1980 нче еллар әдәбияты". Укытучы бу чорга иҗтимагый-тарихи күзәтү ясады, презентация ярдәмендә шагыйрьләрнең әсәрләре белән дә таныштылар. Дәрес бик файдалы һәм нәтиҗәле булды.

Республика күләмендә "Сәламәт кыш!" ("Здоровая зимушка, зима!") акциясе старт алды. Мәктәбебездә СМС-балалар хәрәкәтенең "Тукай оныклары" командасы оештыруында урамда, саф һавада күңелле ярышлар уздырылды. Чаңгыда, чана тартып йөгерү, аркан тарту кебек ярышлар үткәрелде. "Сәламәт яшәү рәвеше" девизы астындагы бәйге укучылар күңеленә хуш килде.

Бүген инглиз теле фәненнән Хабибуллина Алина Александровна һәм татар теле фәненнән Әюпова Рания Фирдүсовна ачык дәресләр күрсәттеләр.
Инглиз теле дәресе 7 нче сыйныфта "Модальные глаголы" темасына узды. Укучыларга презентация һәм төрле күнегүләр ярдәмендә яңа тема аңлатылды. Татар теле дәресе 8 нче сыйныф укучылары белән "Иярчен аныклагыч җөмлә" темасына узды. Алар дәрестә презентация, индивидуаль карточкалар белән эшләделәр һәм алдагы темаларны ныгытылар. Ачык дәресне караучыларның бәяләмәләре дә уңай булды.

30нчы гыйнвар көнне мәктәптә 9нчы сыйныф укучылары татар теленнән бердәм дәүләт тесты формасында сынап карау имтиханын тапшырдылар.

Укучылар чаңгы, чана шуу кебек уеннарны бик яраталар. Мәктәптәге чаңгы трассасында төрле эстафеталарда бик актив катнашып киләләр. Шулай ук кышкы ГТО нормаларын тапшыру этабы башланып китте. Укучылар әлеге чарага бик җитди карыйлар һәм катнашалар.

Мәктәбебездә "Кошларга ярдәм!" акциясе дәвам итә. Укучыларыбыз җимлекләр әзерләү, аларны карап тоту эшендә бик актив булып чыктылар. Эшләгән эшләрнең нәтиҗәсе дә куандырырлык...

28 нче гыйнвар көнне Арча педагогика көллиятендә район башлыгы Илшат Нуриев студентлар белән очрашты. Районда югары, һөнәри уку йортларын тәмамлап эшкә кайтканнар өчен нинди мөмкинлекләр бар? Бу көнне әнә шул хакта сүз барды. Студентлар каршында җитәкчеләр, эшмәкәрләр чыгыш ясады. Әлеге очрашуда безнең мәктәпне соңгы биш елда тәмамлаучы укучыларыбыз да катнашты. Аларның күбесе хәзерге көндә Г.Тукай исемендәге Әтнә совхоз техникумында, Арча педагогика көллиятендә, Казанда белем алалар. Бу чара студентлар өчен бик файдалы һәм мәгълүматлы булды.

    Бүген, 27нче гыйнвар, тарихта Ленинград блокадасыннан азат ителгәннәрне искә алу көне. Бүген мәктәбебездә 900 көнлек Ленинград блокадасы турында сөйләшү, үткәннәрне барлау, патриотик хисләр тәрбияләү, батырларны искә алу чаралары үткәрдек...

    Бөек Ватан сугышының беренче көннәреннән үк Ленинградта сугышчан эш кайный башлый. Зур әһәмияткә ия объектларны, һәйкәлләрне каплыйлар, күп кенә завод-фабрикаларны, музей кыйммәтләрен илнең көнчыгышына озаталар. Сугыш башланып, бер атна үтүгә, ун эшелонда 235 мең бала шәһәрдән чыгарыла. Июль – август айларында эвакуацияләнгән халык саны 1 миллионга якынлаша. Шулай булса да, шәһәрдә 2,5 миллион кеше торып кала. Алар шәһәр оборонасын ныгыту эшләрендә катнаша: танкка каршы 625 километр озынлыгындагы чокыр, 400 километр эскарп, меңләгән дот һәм дзот, шәһәр эчендә 35 километр баррикада төзиләр.Июль башыннан Гитлер Ленинградны алу өчен 300 мең солдат һәм офицер, 600 орудие, 5 000 миномет, 1 000 танк, 1 000 самолет җибәрә. Август азагында немецлар өлкәнең күп өлешен басып алалар һәм шәһәргә якынлашалар. Сентябрь башында Шлиссельбургны (хәзерге Петрокрепость) алып, ил белән бәйли торган коры җир юлларын кисәләр. Бердәнбер булып Ладога күле өстендәге су юлы гына кала.1941 елның 4 сентябре көнне гитлерчылар Ленинградны артиллерия утына тоталар. Шул көннән 900 көнлек Ленинградны саклау эпопеясе башлана. Ай буена барган каты сугышлардан соң, безнекеләр дошманнарның һөҗүмен туктаталар. Ленинградны ала алмагач, фашистлар шәһәр халкын ачтан үтерергә карар кылалар. Гитлерчыларның зур каршылык күрсәтүләренә карамастан, 1944 елның 14 гыйнварында гаскәрләр һөҗүмгә күчә. Канкойгыч сугышлар 15 көн буена бара. 27 гыйнварда безнең гаскәрләр 324 орудиедән салют биреп, Ленинградны азат иткән тарихи җиңү турында бөтен дөньяга хәбәр ирештерәләр. Блокадада калучылар арасында балалар да күп булган. Ләкин үлүчеләр аларның саны өлкәннәргә караганда азрак. Бу очраклы хәл түгел. Чөнки өлкәннәр үзләренә дә аз гына бирелгән икмәкнең дә күбесен сабый балаларына биргәннәр.