Бүген мәрхәмәтлелек атнасының өченче көне. Ул Бөтендөня туризм көне буларак билгеләп үтелде. Укучылар саф һавда булдылар, соңыннан Г.Тукай мемориал музеена сәяхәт кылдылар.

Яңа Кырлай урта мәктәбендә укучыларга дини яктан гыйлем һәм тәрбия биргән мөгәллимәбез Гарипова Зәйтүнә Мингали кызы еш була. Иртәнге линейка вакытында июнь аенда «Арча» радиосында оештырылган Коръән укучылар бәйгесенең нәтиҗәләре белән таныштырды. Бәйгедә Арча район мәхәлләләрендә белем алучы шәкертләр тарафыннан укылган сүрә һәм аятьләр радио аша яңгырады һәм 4 класс укучысы Шакирова А. әлеге бәйгедә 3 урынны яулады. Зәйтүнә Мингали кызы җиңүче һәм калган катнашкан укучыларга Арча мөхтәсибе Раил хәзрәт Гыйләҗев һәм иганәчеләрнең истәлекле бүләкләрен тапшырды, укучыларның рухи-әхлакый сыйфатларга ия булып үсүләрен теләп калды.

Бүген көзге Мәрхәмәтлелек атнасы старт алды. Мәрхәмәтлелек атнасы гадәттәгечә Яхшылык дәресеннән башланып китте.

Бүген Арчада Яшьләр эшләре һәм спорт министрлыгы белән берлектә "Балалар иҗтимагый оешмасы" оештырган  республикакүләм  "Яшь гражданнар форумы" узды. Анда безнең мәктәптән Рахимова Д.Д., Минҗанова Ф.Ф., Галимҗанова А.Р. катнашты. Җитәкчеләре Шарафетдинова Г.Н. Соңыннан барлык катнашучыларга сертификатлар тапшырылды.

Сөекле шагыйребез Г.Тукайның әдәби мемориаль  музей комплексында  мәктәбебезнең башлангыч класс укучыларына мәдәни  көндәлек тапшыру кичәсе булды. Бу кичәдә мәктәп китапханәчесе Мифтахетдинова Ф.А., музей хезмәткәрләре һәм авыл китапханәчесе Ахметзянова  Н.Н., мәдәният йорты директоры укучыларга мәдәни көндәлекне ничек тотарга кирәклеген аңлаттылар. Үзләренең фикерләрен,теләкләрен әйттеләр. Кичә 1 класс укучыларына багышланган фильм карау белән тәмамланды. 

Бүген мәктәптә күмәк өмә оештырылды. Укучылар мәктәп территориясен чүпләрдән, яфраклардан арындырдылар,агач кәүсәләрен агарттылар, чәчәклекне тәртипкә китерделәр.

Бүген Яңа Кырлай авылы мәдәният йорты белән берлектә 1-6 класслар өчен, "Без терроризмга каршы!" девизы астында,  "Халыклар дуслыгы" дип аталган кичә үтте. Кичә төрле милләт биюләре һәм  матур җырлар белән үрелеп барды.

Бүген мәктәпкә Арча районының җирлек башлыклары килде.Укучыларыбыз мәктәп каршында дәртле биюләре белән каршы алды. Сөмбелә исә байлыгы белән уртаклашты. Кунаклар балалар бакчасында да булдылар. Җирлек башлыклары районыбыз мәктәпләренең яңа уку елына әзерлекләрен карыйлар.Яңа уку елына әзерлек уңай дип бәяләнде.

Мәктәбебездә халык күңеленә "Калфаклы сандугач" булып кереп калган мәшһүр композитор Сара Садыйкованың кызы Әлфия Айдарская белән очрашу булды. Очрашуны мәктәп китапханәчесе Мифтахетдинова Ф.А. һәм музыка укытучысы Шарафетдинова Г.Н. алып бардылар. Кичә Сара Садыйкованың җырлары белән үрелеп барды. Аларны югары класс укучылары Галимҗанова А. һәм Минҗанова Ф. башкардылар. Әлфия Айдарская китапханәгә күптән түгел дөнья күргән "Биби Сара моңнары" һәм "Ил кызы" дип аталган җырлар китабын бүләк итте. Укучыларга укуларында уңышлар теләп калды.