Мәктәбебез укучылары көн саен мәктәбебез территориясен чистарту, җыештыру эшләрендә катнашалар.

Гимназия базасында узган "Укытучылар Спартакиадасы"нда мәктәбебез командасы уңышлы чыгыш ясады. Иң-иңнәр арасына Галиев Зиннур Дамирович керде. Ул винтовкадан ату буенча ярышта беренче урын яулады. Афәрин, булдырасыз!

 Тәрбия эшләре буенча директор урынбасары Шакирова Диана Замировна, тәрбияче Ильясова Зилә Рудисовна 8-9 сыйныф укучылары белән берлектә төрле елларда мәктәптә эшләп, лаеклы ялга чыккан Түбән Табын, Тегермәнлек авылларында яшәүче укытучыларны "Укытучыларны котла!" акциясе кысаларында, өйләренә барып, "Укытучылар көне" белән котлап, кулдан ясалган бүләкләр тапшырып кайттылар.  Чара бик тәрбияви булды, өлкәннәр чын күңелләреннән сөенеп, рәхмәт хисләре белән озатып калдылар.

5-9 нчы сыйныф укучылары мәктәбебездә эшләүче һәр укытучы-тәрбиячене "Укытучылар көне" белән котлап, изге теләкләрен җиткерделәр, үзләренең куллары белән ясалган бүләкләрне тапшырдылар.

Көзнең матур көннәре тору сәбәпле, мәктәбебез Табын җирлегенең табигатенә экскурсиягә чыкты. Укучылар көзге матурлык белән сокланып, фотоларга төштеләр, төрле уеннар уйнадылар. Соңыннан укытучы Хөсәенов Айрат Раилович пешергән бәрәңгене ашап, яхшы кәеф белән мәктәпкә кайттылар. Экскурсия бик күңелле булды!