Бүген мәктәбебездә бик мөһим һәм куанычлы вакыйга булып узды. Физика, математика, химия һәм биология кабинетлары нигезендә өр-яңа агросыйныфлар ачылды.
Бу заманча белем бирү киңлекләре соңгы технологияләр һәм махсус лаборатория җиһазлары белән тәэмин ителде. Беренче күрсәтмә дәрестә үк балалар да, укытучылар да яңа җиһазларның мөмкинлекләрен зур кызыксыну белән сынап карадылар.

Шатлыгыбызны уртаклашырга һәм мәктәп коллективын котларга олы кунакларыбыз — районыбыз башлыгы Рөстәм Хисамиев, Татарстан Дәүләт Советы депутаты Камил Нугаев, башкарма комитет җитәкчесе Айрат Каюмов, авыл хуҗалыгы һәм азык-төлек идарәсе җитәкчесе Таһир Баязитов, мәгариф бүлеге җитәкчесе Рафис Фатыхов, күмәк хуҗалык рәисләре килде.

Шушы проектны тормышка ашыруда зур ярдәм күрсәткән Фәйзи Галиев исемендәге күмәк хуҗалык, «Күшәр» һәм «Таң» күмәк хуҗалыклары җитәкчеләренә олы рәхмәтебезне җиткерәбез. Сезнең ярдәм белән мәктәбебездә балалар өчен өр-яңа мөмкинлекләр туды.

Яңа якты сыйныфларыбыз укучыларга өстәмә белем алырга һәм киләчәктә заманча, престижлы һөнәрләр сайларга зур этәргеч булыр дип ышанабыз.