Бүген Россия Федерациясе Халыклары телләре көнен бәйрәм итү кысаларында, безнең бакчабызда гаҗәеп, тылсымлы бер көн — Әкият көне узды. Бу көнне балалар гына түгел, хәтта әниләр дә ниндидер тылсым көтеп бакчабызга ашыктылар. Әкият иленә балалар үзләренең Габдулла Тукайның яраткан әкият геройларының киемнәреннән килделәр. Биредә батыр Кәҗә белән Сарыкны да, тапкыр Шурале белән Су анасын да, кечкенә Машаларны да очратырга мөмкин иде. Бәйрәм дәвамында балалар, әниләр өчен төрле кызыклы уеннар, бәйгеләр оештырылды. Бу көннең иң дулкынландыргыч өлеше — «Кәҗә белән Сарык» әкиятен сәхнәләштерү булды. Балалар үзләрен чын артистлар кебек хис иттеләр: алар сүзләрне яттан сөйләделәр, хәрәкәтләрне табигый башкардылар. Тамашачыларның алкышлары аларның күңеленә зур шатлык өстәде.    Әкият көне балаларга күңел ачу гына түгел, дуслык, ярдәмчеллек һәм игелеклелек кебек сыйфатларның мөһимлеген дә тагын бер кат искә төшерде. Әкият дөньясы аша алар яхшылыкның һәрвакыт явызлыкны җиңүенә тагын бер кат инандылар. Әниләр белән әкиятләргә битлекләр ясау бәйрәмебезгә тагын да җылылык өстәде, бу тылсымлы көн һәр баланың күңелендә якты һәм онытылмаслык бер хатирә булып уелып калды.